Nakabsan sa kinabuhi ang usa ka menor de edad nga babaye human kini malunos samtang naligo sa Muleta River, Maray-Maray, Don Carlos, Bukidnon niadtong milabayng adlaw.
Subay sa report, ang biktima lumulupyo sa Purok-8, New Nongnongan sa maong lungsod.
Nasayran nga gibilin sa inahan ang biktima sa mga magulang niini kaniadtong alas 5:00 sa buntag sa adlaw sa panghitabo aron moadto sa trabaho, apan taliwala sa takna sa alas 7:00 hangtod alas 8:00 sa buntag, gikuha ang biktima sa usa ka silingan aron magmaneho og motor paingon sa sapa para manglaba ug maligo.
Apan samtang anaa sa sapa, aksidenteng nalunos ang biktima ug daling gidala sa Pahilan Hospital aron matambalan. Bisan pa man sa paningkamot sa mga doktor, gideklarar nga patay na ang bata pag-abot sa alas 12:30 sa tungang gabii, sa Abril 27, ning kasamtangang tuig.
Ang patay’ng lawas sa biktima anaa na karon sa Agreda Funeral Homes samtang nagpadayon ang imbestigasyon sa maong trahedya.