Gikabalak-an ang nagkataas nga ihap sa mga batan-ong nagmabdos nga nag-edad og 10 hangtod 14 anyos sa Bukidnon, bisan pa sa kinatibuk-ang pagkunhod sa kaso sa teenage pregnancy sa probinsya niadtong 2024.
Base sa datos sa Philippine Statistics Authority o PSA nga gipahayag ni Emily Marie Estacio-Quiro, Population Program Officer IV, mikunhod ngadto sa 4,592 ang kinatibuk-ang kaso sa teenage pregnancy niadtong 2024, gikan sa 4,719 niadtong 2023.
Apan sa edad 10 hangtod 14 anyos, misaka ang kaso ngadto sa 135 gikan sa 124, diin 12-anyos ang pinakabata nga edad nga natala.
Giklaro ni Estacio-Quiro nga usa sa mga nag-unang hinungdan sa sayong pagmabdos ang kakulang sa parental guidance, gisundan sa impluwensya sa social media ug peer pressure.
Tungod niini, gipakusgan sa POPDEV ang Adolescent Sexual and Reproductive Health Education sa mga eskwelahan, lakip ang pagpatuman sa Republic Act 11596 o Prohibition of Child Marriage, ug paghatag og alternatibong edukasyon pinaagi sa ALS ug TESDA alang sa mga batan-ong inahan.