Gibutyag na ni Interior Secretary Jonvic Remulla ang pagkatawo sa pulitiko sa Mindanao nga giingong nalambigit sa pagsulay sa pagsulod sa Pilipinas gikan sa Laos sa shabu nga nagkantidad og P3.5 bilyon.
Sa diagram nga gipagawas ni Remulla, giila ang maong pulitiko nga si Bangsamoro Parliament member Edriezan Hadji Nasser Rimbang, nga giingong nalambigit sa pagpasulod sa 521 ka kilo sa methamphetamine hydrochloride o shabu.
Sayran nga minyo si Rimbang kang Princess Rohaniah Rimbang, igsoon sa asawa ni alyas “Fahad,” nga gidakop sa tugpahanan sa Laos. Giingong gibayran usab ni Rimbang si Police Master Sergeant Aileen Jane Manalo Mendoza alang sa landing rights sa pribadong hangar diin giplanong motugpa ang eroplano. Samtang, si Captain Rioklyn Toledo o alyas “Boyet” maoy gikontak kalabot sa eroplano nga gikan sa Malaysia paingon sa Laos.
Giklaro ni Remulla nga wala pa makatugpa sa Pilipinas ang maong eroplano. Gikumpirma usab ni Philippine National Police (PNP) chief Police General Jose Melencio Nartatez Jr. nga gitangtang na sa puwesto si Mendoza ug anaa sa restrictive custody sa Aviation Security Group. Samtang ang Sultan nga gihisgotan sa maong imbestigasyon anaa gihapon sa Pilipinas, sumala sa report.