Nakasakmit sa Police Regional Office 10 (PRO 10) ang gibana-banaang P1.93 milyones nga kantidad sa gituohang shabu ug nadakpan ang usa ka high-value individual (HVI) atol sa usa ka buy-bust operation sa Barangay Bayabas, Cagayan de Oro City, mga alas 8:33 sa gabii niadtong Oktubre 13, 2026.
Ang mga personahe sa City Drug Enforcement Unit (CDEU) sa Cagayan de Oro City Police Office (COCPO), kauban ang COCPO City Mobile Force Company (CMFC) ug sa koordinasyon sa Philippine Drug Enforcement Agency (PDEA) Region 10, maoy nagpahigayon sa operasyon nga misangpot sa pagkasikop sa usa ka alyas “Roger,” usa ka biyudo, kinsa nalista isip HVI ug residente sa Cagayan de Oro City.
Nakasakmit atol sa operasyon ang 11 ka heat-sealed transparent plastic sachets nga lain-laing gidak-on nga adunay sulod nga nga gituohang shabu, nga motimbang og gibana-banaang 284.76 gramos, ug adunay Standard Drug Price (SDP) nga P1,936,368.00. Narekober usab sa mga awtoridad ang usa ka sling bag, usa ka Android cellphone, ug tulo ka papel de banko—usa ka P100, usa ka P50, ug usa ka P1,000—nga gigamit isip buy-bust money.
Ang suspetsado anaa karon sa kustodiya sa Maharlika Custodial Facility alang sa tukmang disposisyon samtang nag-atubang og kaso sa kalapasan sa Sections 5 ug 11 sa Republic Act No. 9165, naila usab isip Comprehensive Dangerous Drugs Act of 2002. Samtang, ang mga nasakmit nga butang isumite sa Regional Forensic Unit 10 alang sa qualitative ug quantitative examination.