Usa ka talagsaong kahayag nga susama sa usa ka dikya o jellyfish ang nakadani sa atensyon sa mga tawo sa kalangitan ibabaw sa Space Coast sa Florida, Estados Unidos, human sa paglansad sa Falcon 9 rocket sa SpaceX alang sa ika-35 nga komersyal nga misyon sa pagdala og suplay ngadto sa International Space Station (ISS) sa NASA.
Ang maong panghitabo, nga gitawag og “space jellyfish,” nahitabo dihang ang kahayag sa adlaw mituhop sa nagkalapad nga aso o exhaust plume sa rocket samtang kini misaka sa taas nga bahin sa atmospera, sa wala pa mosubang ang adlaw sa maong lugar.
Bisan og susama sa usa ka higanteng dikya nga naglutaw sa kangitngit sa kalangitan, natural kini nga epekto sa kahayag sa adlaw nga miigo sa aso sa rocket.
Mahimo usab kining makita human mosalop ang adlaw, depende sa kahimtang sa kahayag ug atmospera.