Nakakumpiska og kapin P36.21 milyon nga kantidad sa mga kontrabando ang Police Regional Office 10 o PRO-10 atol sa gipakusgang operasyon niini gikan Agosto 13 hangtod 19, 2026.
Kapin 64 ka operasyon batok iligal nga droga ang gihimo sa kapulisan, nga misangpot sa pagkadakop sa 70 ka indibidwal ug pagkakumpiska sa 466.806 gramos nga shabu ug mga tanom ug pinauga nga dahon sa marijuana nga nagkantidad og kapin P3.57 milyon.
Nakarecord usab ang PRO-10 og 16 ka operasyon batok iligal nga sugal nga misangpot sa pagkadakop sa 20 ka indibidwal.
Sa operasyon batok sa mga wanted person, 39 ang nadakpan, lakip ang 13 ka most wanted ug 26 ka ubang wanted persons.
Samtang, tulo ang nadakpan sa kampanya batok loose firearms ug 18 ka armas ang nakumpiska, gitugyan o narekober.
Unom usab ang nadakpan sa walo ka operasyon batok iligal nga pagmina, diin nakumpiska ang mineral ores ug heavy equipment nga nagkantidad og kapin P29.63 milyon.
Tulo pa ang nadakpan sa 34 ka operasyon batok cigarette smuggling, diin nakumpiska ang kontrabando nga nagkantidad og kapin P3 milyon.