Usa ka aksidente sa sakyanan ang nahitabo sa Valencia City, Bukidnon, niadtong milabay’ng adlaw , nga naglambigit sa duha ka trak ug miresulta sa pagkaangol sa drayber ug sakay niini.
Ang insidente naglambigit sa usa ka Isuzu Cargo Truck ug usa ka Fuso Truck, diin ang drayber sa Isuzu nakaangkon og mga samad ug gidala sa ospital.
Nahitabo ang panagbangga dihang ang Fuso Truck, nga gikan sa Flying-V Gas Station, misulod sa Sayre Highway ug misulay pagliko sa wala nga bahin, dayon nabanggaan sa Isuzu Cargo Truck nga nagbiyahe padulong sa Malaybalay City.
Ang pasahero sa Isuzu ug ang drayber sa Fuso nakaangkon usab og gagmay nga mga samad apan mibalibad nga dad-on sa ospital.
Sa inisyal nga imbestigasyon, gituohan nga ang drayber ug pasahero sa Isuzu Cargo Truck nakainom og ilimnong makahubog sa panahon sa aksidente.
Ang duha ka sakyanan nakaangkon og dakong kadaot ug nagpabilin pa sa dapit sa insidente samtang nagpadayon ang imbestigasyon.