Tingkagol sa selda ang lima ka personalidad nga nalambigit sa iligal nga droga human nadakpan sa gipahigayon nga sunod-sunod nga buy-bust operation sa mga lungsod sa Don Carlos ug Kitaotao, ingon man sa dakbayan sa Valencia, Bukidnon.
Sa Valencia City, duha ka managlahing operasyon ang gipahigayon sa mga awtoridad nga nagresulta sa pagkadakop ni alyas “Bajai”, 32-anyos, diha sa Barangay Poblacion diin nasakmitan kini og 6.3 gramo sa shabu nga mobalor og ₱42,840. Nasikop usab sa Barangay Mailag si alyas “Ailyn”, 45-anyos, nga nakumpiskahan og 10.3 gramo sa maong gidili nga tambal nga nagkantidad og ₱70,040.
Samtang sa lungsod sa Kitaotao, nadakpan sa Barangay Poblacion si alyas “Brylle”, 31-anyos, human makuhaan og 0.3 gramo sa shabu nga nagkantidad og ₱2,040. Sa lungsod naman sa Don Carlos, gipaninglan usab sa balaod sila si alyas “Dindo”, 54-anyos, ug alyas “Dan”, 44-anyos, human nasakmitan og 0.5 gramo sa shabu diha sa Barangay Masimag.
Sa katibuk-an, moabot sa 17.4 gramo sa shabu nga nagkantidad og ₱118,320 ang nasakmit sa Bukidnon Police Provincial Office sa pagpanguna ni Provincial Director PCOL Oliver Sotto Navales. Ang tanang dinakpan nag-atubang na karon og kasong paglapas sa Republic Act 9165 o Comprehensive Dangerous Drugs Act of 2002.