Napalgan nga wala na’y kinabuhi ang usa ka 25-anyos nga lalaki luyo sa usa ka waiting shed sa Purok 1, Barangay San Miguel, lungsod sa Manolo Fortich, Bukidnon, pipila ka oras human kini gidunggab atol sa gipahigayon nga kalingawan sa kapistahan sa maong dapit.
Subay sa imbestigasyon sa Manolo Fortich Municipal Police Station, nag-inom ang biktima ug ang iyang higala sa wala pa mitambong sa kalingawan sa covered court. Pag-abot sa alas-7:00 sa gabii niadtong Setyembre 29, nagkalalis ang biktima ug ang 22-anyos nga suspek duol sa usa ka tindahan human nangutana ang biktima kon ang suspek ba ang tag-iya niini.
Tungod sa maong paglalis, gihulbot sa suspek ang usa ka kutsilyo ug gidunggab ang biktima sa wala nga bahin sa hawak. Misuway pa sa pagdagan ang biktima samtang miikyas usab ang suspek. Tungod kay gabiing dako, wala na makit-an sa iyang mga kauban ang biktima bisan taliwala sa pagpangita.
Pagka-buntag na sa Setyembre 30, nahipusilag sa usa ka molupyo ang biktima nga naghigda na luyo sa waiting shed. Dali kining gidala sa local rescue team ngadto sa Rural Health Unit sa Barangay Tankulan apan gideklara kining dead on arrival sa nag-atiman nga doktor. Padayon pa ang gihimong pagpanggukod sa kapolisan batok sa miikyas nga suspek.