Gibutyag ni kanhi world No. 4 Greg Rusedski nga wala kini mabalaka sa bag-ohay nga performance ni Filipina tennis star ug world no. 19 Alex Eala sa iyang mga duwa.
Bag-ohay lamang, nakurat ang mga fans sa Filipina pride human kini sayo nga natangtang sa iyang kampanya sa Wuhan Open sa China human mapildi sa home bet ug world no. 217 Han Shi.
Sa wala pa kini, napakyas usab si Eala sa iyang kampanya sa Singapore Tennis Open human mapildi sa pambato sa Russia ug world no. 180 nga si Tatiana Prozorova.
Pakyas usab si Eala nga makuha ang gitinguha niining bulawan sa miaging Asian Games sa Japan human makuha ang bronze gikan sa iyang semifinal match batok kang Wang Xiyu sa China.
“It’s not surprising that this dip has happened,” matud pa sa kanhi world no. 4 sa iyang Off Court podcast.
Dugang pa ni Rusedski nga misaka ang demand kang Eala human sa iyang malampusong Wimbledon ug US Open ug nakasalmot sa nagkalain-laing kalihokan gawas sa iyang tennis career.
Apan masaligon nga gipahayag sa 1997 US Open finalist nga makabawi ang Filipina star ug makakuha og positibong resulta sa umaabot. Nagtuo usab si Rusedski nga angay si Eala nga maapil sa mga seeded player sa Australian Open nga mahitabo sa pagsugod sa 2027.
Bag-ohay lang, gibutyag usab ni Rusedski ang iyang pagka-abli sa pag-coach kang Eala sa pagtapos sa iyang season.
“I’d love to have a crack at it. I don’t know if I’d ever be invited to do so,” matud ni Rusedski nga naila sa iyang makusog nga serve.
Kini may kalabutan sa pag-angkon ni Eala nga dili pa kaayo maayo ang iyang pag-serve sa iyang mga dula, lakip na sa iyang Wimbledon game batok sa Italian bet Jasmine Paolini.