Gipadali na karon ang mga pagpangandam alang sa operasyon sa Bukidnon Airport human gipahigayon ang usa ka ocular inspection ug round-table discussion aron masiguro ang hapsay nga dagan sa maong proyekto.
Ang inspeksyon, gipanguluhan ni Bukidnon Governor Rogelio Neil P. Roque, diin mipadayag sa iyang dakong kalipay sa padayong paglambo sa Bukidnon Airport Development Project.
Gihulagway sa gobernador ang maong pasilidad dili lamang isip usa ka proyekto sa imprastraktura, kondili usa ka mahinungdanong “catalyst” o tigpadasig sa pag-uswag sa tibuok probinsya.
Base sa projection sa lokal nga kagamhanan, ang pag-abli sa airport magsilbing ganghaan alang sa mas daghang oportunidad.
Gilauman nga kini makahatag og mas hamugaway nga koneksyon nga makapadasig sa turismo, patigayon, ug pagdani sa mas daghang investments o puhunan. Lakip sa misusi sa proyekto mao si Mr. Cornelio L. Cruz II, Chairperson sa Provincial Events Committee.
Gitan-aw niini ang kahimtang sa sulod sa passenger terminal building sa Bukidnon Airport isip kabahin sa nagpadayong pagpangandam alang sa hingpit nga operasyon niini.
Atol sa iyang inspeksyon, gipakita ug gipatin-aw ni Cruz ang dagan sa proseso sa operasyon sa higayon nga ablihan na ang tugpahanan. Usa sa iyang gihatagan og pagtagad mao ang check-in area sa terminal, diin paspas ug episyente nga serbisyo ang tumong sa probinsya alang sa mga pasahero.