Gideklarang “totally damage” ang kahimtang sa Malinao Creek ug Lumayagan Creek sa Barangay Kalasungay, human kini maapektuhan pag-ayo sa pag-abli sa usa ka bag-ong karsada (parallel road) sa maong dapit.
Kini ang gipadayag ni Barangay Kalasungay Indigenous People (IP) Mandatory Representative Datu Jomar Sario, atol sa 46th Regular Session sa Sangguniang Panlungsod niadtong Hunyo 2, 2026.
Subay sa taho, ang maong mga sapa nagsilbi nga nag-unang tinubdan sa tubig alang sa Malaybalay City Water District, busa ang kadaot niini usa ka dakong hulga sa suplay sa tubig sa tibuok syudad.
Giklaro sa opisyal nga ang pag-abli sa bag-ong karsada maoy hinungdan sa grabeng siltasyon ug pagkaguba sa ekolohiya sa maong mga sapa.
Agig aksyon sa maong isyu, gibutyag sa IP representative nga personal na niining gipadangat ang maong problema ngadto kang Malaybalay City Mayor Jay Warren Pabillaran.
Gawas niini, nakig-alayon na usab ang barangay ngadto sa Committee on Environment sa Sangguniang Panlungsod aron mapahigayon ang dinaliang inspeksyon.
Tungod sa maong panghitabo ug kahimtang sa kinaadman, hugot nga nanawagan ang City Environment and Natural Resources Office (CENRO) sa Malaybalay og dinaliang pagpahamtang og tukmang multa ug silot batok sa mga responsable sa dakong kadaot sa kalikopan nga resulta sa usa ka proyekto sa dalan sa maong dakbayan.
Atol sa sesyon gikumpirma sa maong buhatan pinaagi ni Jessie G. Suson ang Head sa City Environment and Natural Resources sa Malaybalay, nga usa ka dakong kalapasan sa kalikupan nga miresulta sa grabeg kadaot sa tinubdan sa panubig sa daghang lugar sa dakbayan.