Duha ang nakabsan sa kinabuhi human nagbangga ang usa ka motorsiklo ug usa ka van sa Maramag–Wao Road, Purok 6, Barangay Lantay, sa maong lungsod, niadtong milabayang adlaw, pasado alas 6:20 sa buntag.
Gideklarang patay sa attending physician sa Pangantucan Medical Hospital ang drayber ug ang backrider sa Honda XRM125 human makaangkon og grabeng samad sa ulo.
Samtang, ang drayber sa Toyota Hiace Commuter van nakaangkon lamang og minor nga mga samad ug kasamtangang gitanggong sa Pangantucan Municipal Police Station (MPS) aron atubangon ang tukmang mga kaso.
Base sa imbestigasyon sa kapulisan, nagbiyahe ang motorsiklo gikan sa Barangay Adtuyon paingon sa Barangay Barandias. Pag-abot sa kurbadang bahin sa dalan, giingong mikaon sa pikas lane ang kasugat niini nga van, hinungdan sa head-on collision.
Tungod sa kakusog sa impak, nabangga pag-usab pa ang motorsiklo ngadto sa usa ka naka-park nga sakyanan sa daplin sa dalan.
Daling gitabang ang mga biktima sa MDRRMO personnel ug gidala sa ospital, apan wala na maluwas ang kinabuhi sa duha ka sakay sa motorsiklo.