Dili tawo ang misulod sa bangko, apan tingog nga gihimo sa artificial intelligence (AI) ang gigamit aron makapangawat og €95 milyon o kapin ₱6.7 bilyon gikan sa usa ka bangko sa Italy.
Base sa mga report, gigamit sa mga suspek ang AI voice cloning aron tukmang masundog ang tingog sa CEO sa bangko.
Pinaagi sa maong peke nga tingog, nakahatag og mando ang mga suspek nga ibalhin ang dakong kantidad sa kuwarta ngadto sa mga foreign accounts.
Nailad ang bangko sa peke nga mando, nga misangpot sa pagkawala sa kuwarta nga mokabat sa bilyon-bilyong piso.
Nagpakita ang insidente kung giunsa paggamit sa mga kriminal ang AI dili lamang sa paghimo og peke nga mga hulagway o video, kondili usab sa pagsundog sa tingog aron makapahimo og malimbungon nga transaksiyon.