Nagpaalim karon sa balay tambalanan ang usa ka 33-anyos nga lalaki human kini gipusil sa wala mailhing mga suspek daplin sa Sayre Highway sa Purok 12, Barangay Dologon, Maramag, Bukidnon kaniadtong Miyerkules sa gabi-i, Setyembre 23, 2026.
Subay sa report ni Bukidnon Police Provincial Office (BPPO) Director PCOL Oliver Sotto Navales, nakaplagan sa crime scene ang pipila ka basiyo sa bala sa 5.56mm nga kalibre sa armas. Pagkahuman sa pamusil, paspas nga miikyas gikan sa dapit ang usa ka kulay silver nga Toyota Vios (plate number LWZ 385), nga sa ulahi nakit-ang gi-abandonar sa Purok 7, Barangay Butong, Quezon, Bukidnon nga aduna na’y mga agi sa bala sa tuo nga bahin niini.
Gidala ang biktima pinaagi sa Barangay Butong Rescue ngadto sa Bukidnon Provincial Hospital sa Maramag alang sa medikal nga pagtambal. Padayon karon ang gihimong imbestigasyon sa Maramag Municipal Police Station samtang gi-aktibar na ang Oplan Shield sa kaporisan aron matultolan ug madakpan ang mga responsable sa maong pagpamusil.