Nasikop sa gipahigayong buy-bust operation sa kapolisan ang tulo ka lalaki nga giilang Street Level Individuals (SLI) human matiktikan ang ilang ilegal nga aktibidad diha sa Purok 4, Barangay Tawas, lungsod sa Kitaotao, Bukidnon.
Sa taho nga nadawat sa Bombo Radyo gikan sa Kitaotao Municipal Police Station, nasikop ang pangunang suspek nga giilang si alyas “Mario”, legal ang edad, kauban ang duha pa ka kaubanan niini. Nakuha gikan sa mga suspek ang usa ka empty roll-on container nga gihimong tagoanan sa walo ka sachet sa gitoohang shabu nga nagtimbang og 3.86 ka gramo ug nagkantidad og ₱26,248.
Gawas sa gidiling drugas, nasakmit usab ang kagamitan sa pag-singhot, mga cellphone, ug ang buy-bust money. Giandam na ang pormal nga kasong paglapas sa Republic Act 9165 batok sa mga suspek nga kasamtangang pabilin nga gihuptan sa selda sa Kitaotao MPS.