Mikabat na sa 69 ka tawo ang kumpirmadong namatay human sa kusog nga linog nga miigo sa Cebu niadtong Martes sa gabii, samtang gipadayon sa mga awtoridad ang search and rescue efforts sa kritikal nga unang 24 oras diin posible pa nga maluwas ang mga na-trap sa mga guba nga bilding.
Matod ni Office of Civil Defense (OCD) Assistant Secretary Rafael Alejandro IV, labing daghan sa mga patay gikan sa Bogo City, nga mao usab ang epicenter, nga adunay 30 ka biktima.
Gisundan kini sa San Remigio nga adunay 22, Medellin nga adunay 10, Tabogon nga lima, ug tag-usa sa mga lungsod sa Sogod ug Tabuelan.
Matud ni Alejandro nga kini nga ihap base pa sa report nga nadawat sa ilang opisina ug kinahanglan pa kini i-validate ug i-verify.
Naila usab nga 147 ka tawo ang nasamdan tungod sa linog: 119 gikan sa Bogo City, 14 sa San Francisco, lima sa Tabuelan ug Catmon, ug upat sa Daanbantayan.
Matud sa opisyal, ang taas nga ihap sa mga biktima gumikan nahitabo ang linog sa gabii dihang daghan ang nagatulog.
Sumala sa Philippine Institute of Volcanology and Seismology (Phivolcs), ang linog adunay kusog nga 6.9 magnitude, nga mitungha alas 9:59 sa gabii.
Ang epicenter niini anaa 21 kilometro sa amihanang-sidlakan sa Bogo City, uban sa shallow depth nga lima ka kilometro.