Dismayado ang sektor sa mga lumad human nasayran nga hingpit nang naubong og lapok ang sikat nga Malinao Creek ug Kiagong Falls sa Malaybalay City tungod sa usa ka road construction project.
Sa pakighinabi sa Bombo Radyo Malaybalay, wala kapugngi ang kasuko ni Datu Jomar Sario sa Barangay Kalasungay Indigenous Peoples Mandatory Representative (IPMR), diin gihulagway niini nga natabunan na og balas, ug yuta ang maong sagradong sapa ug busay nga paingon sa Tagoloan River.
Giisip sa komunidad nga usa ka lunsay nga krimen batok sa kinaiyahan ang pagkaasoy sa maong dapit, diin daw gisakripisyo ang natural nga bahandi sa lungsod alang lamang sa giingong “kauswagan.”
Tungod niini, nanawagan karon og dinaliang rehabilitasyon ug tulubagon si Datu Sario gikan sa kontraktor ug mga ahensya sa gobyerno, dungan sa pagpangutana kon nganong gipasagdan nga maguba ang maong protektadong dapit nga walay igong pagpakabana sa epekto niini sa kalikupan.