Sa unang higayon sa kasaysayan sa NBA, duha ka magduduwa nga duna’y dugong Pilipino ang mag-abot ug magkaatbang sa labing dako nga entablado sa basketball—ang NBA Finals.
Kini human nakuha sa San Antonio Spurs, diin magduduwa ang Fil-Am rookie nga si Dylan Harper, ang kampiyonato sa Western Conference batok sa Oklahoma City Thunder sa Game 7 sa iskor nga 111-103. Tungod niini, pormal nga makatigi ni Harper sa Finals ang laing sikat nga Fil-Am nga si Jordan Clarkson ug ang iyang koponan nga New York Knicks.
Kini na ang ikaduhang higayon nga makasulod sa NBA Finals si Clarkson, kinsa mipresentar usab sa Gilas Pilipinas kaniadto, human sa iyang unang pagsalmot uban sa Cleveland Cavaliers niadtong 2018. Sa pikas bahin, si Harper, nga anak sa kanhi NBA champion nga si Ron Harper ug duna’y inahan nga lumad nga taga-Bataan, mapasigarbohon kaayo nga nagrepresentar sa Pilipinas niini nga dula.
Magsugod ang kulbahinam nga serye sa NBA Finals karong umaabot nga Hunyo 4 (oras sa Pilipinas) diin sigurado na nga usa ka magduduwa nga duna’y dugong Pinoy ang movisa ug moalsa sa Larry O’Brien championship trophy.