Quezon City napili nga sunod nga host sa Palarong Pambansa 2027

Napili ang Dakbayan sa Quezon isip sunod nga mamahimong host sa Palarong Pambansa 2027.

Gikumpirma kini ni Department of Education (DepEd) Undersecretary Malcolm Garma, nga aduna na silay koordinasyon sa kagamhanan sa Quezon City bahin sa ilang pag-host sa 67th edition sa maong tinuig nga multi-sport event.

Sa umaabot nga closing ceremony, moadto ang delegasyon sa Quezon City alang sa turnover sa pag-host sa maong sporting event.

Kahinumduman nga ang host karong tuiga sa Palarong Pambansa mao ang Agusan del Sur diin adunay kapin sa 13,000 ka mga estudyanteng atleta ang misalmot.