Gikabalak-an sa mga residente ug mga lider sa tribu ang padayong pagdahili sa yuta ug pagkaanod sa mga balas ug graba gikan sa mga proyekto sa dalan padulong sa mga sapa ug agianan sa tubig sa Malaybalay City, Bukidnon.
Atol sa ika-45 nga regular nga sesyon sa Sangguniang Panlungsod niadtong Mayo 26, 2026, gipresentar ang mga nakitang problema atol sa gihimong inspeksyon sa multi-party monitoring team.
Sa mga hulagway nga gipakita, makita ang grabeng epekto sa erosion sa mga dapit nga gipahigayonan sa road construction. Tungod niini, gipatawag sa konseho ang atensyon sa mga hingtungdan aron dinalian nga matutokan ang maong isyu.
Gihangyo ang paghimo og tukmang mga solusyon aron mapugngan ang dugang kadaot sa kinaiyahan ug maprotektahan ang mga komunidad nga apektado niining maong problema.
Nunot niini, gisugyot ni Hon. City Councilor Nikko Aldeguer nga gikinahanglan ang lawom nga pagsusi ug panaghisgot kalabot sa maong isyu.
Gipadayag niini nga ang kasamtangang disenyo sa mga dalan mahimong makababag sa natural nga agianan sa tubig.
Tungod niini, nabalaka kini nga mahimong mosangpot kini sa pag-usab sa agianan sa tubig padulong sa ubang mga creek, o mas grabe pa, mahimong hinungdan sa pagbaha (flash floods) sa mga duol nga mga balay.