Giaresto sa mga otoridad ang nailang founder sa Gawad Kalinga nga si Tony Meloto sa Angat, Bulacan human kini giisyuhan og warrant of arrest tungod sa giatubang niining kasong qualified trafficking in persons.
Gikumpirma sa Police Regional Office 3 (PRO-3) nga duha ka ihap o (2 counts) sa maong kaso ang gipasaka batok niini, diin giisip kini nga ‘non-bailable’ o walay gitugot nga pyansa alang sa iyang temporaryong kagawasan.
Base sa resolusyon sa Department of Justice (DOJ), nakitaan og probable cause ang reklamo kalabot sa giingong sexual abuse ug pang-abuso sa iyang otoridad ngadto sa duha ka lalaking scholars ug benepisyaryo sa organisasyon niadtong tuig 2017 sa GK Enchanted Farm.
Gawas niini, usa sa mga biktima ang giingong nakasinati usab og pang-abuso samtang kauban si Meloto sa usa ka speaking engagement sa Lyon, France, nga maoy hinungdan sa iyang pagbiya sa maong grupo human sa gilayong internal investigation sa board sa maong tuig.