Prisohan ang bagsakan sa usa ka lalaki human niini giingong giguyod ang usa ka saysentay-tres anyos nga lola nga person with disability kun PWD didto sa Purok 17C, Hagkol, Barangay Poblacion, Valencia City, Bukidnon, kagahapon sa sayong bahin sa buntag, Mayo 30.
Sa report sa Valencia City Police Station, nasayran nga ang biktima—nga usa ka dialysis patient ug duna nay daang deperensya sa bat-ang—pasahero lang sa usa ka motorsiklo dihang kalit kining gigunitan ug giguyod sa suspek paglabay sa maong dapit duol sa usa ka gasoline station.
Tungod sa hitabo, nataktak ang biktima sa motor hinungdan nga nakaangkon kini og mga samad sa tuong bukton ug kamot, lakip na ang hematoma o pagpuyo sa dugo sa likod sa iyang ulo nga daling gidala sa balay-tambalan.
Sa gihimo nga manhunt operation sa kapulisan, malampuson nga nasikop ang suspek diin nabisto nga hubog diay kini sa dihang nahitabo ang insidente.
Sa pagkakaron, ang suspek balhog na sa selda sa Valencia CPS ug gihikay na ang tukmang kaso nga ipasaka batok kaniya.