Upat pa ka lalaki nga natrap sa bahaon nga langub sa Laos naluwas na sa mga rescuer

Upat pa ka mga minero ang luwas nga nakuha sa mga rescuer gikan sa sulod sa bahaon nga langub sa Xaysomboun province, Laos, kagahapon, Mayo 30, human sa napulo ka adlaw nga pagkatrap sa ilawom sa yuta.

Naluwas ang upat human walay hunong nga gipumpahan ug gihubasan sa tubig ang sulod sa langub aron makasulod ang mga internasyonal nga diver ug magiyahan sila pagawas. Sa kasamtangan, moabot na sa lima ang kinatibuk-ang naluwas, samtang padayon pa gihapon ang pagpangita sa laing duha ka mga kauban nga nagpabilin nga missing.

Nisulod ang pito ka mga lokal nga minero sa maong langub niadtong Mayo 20 aron mangita og bulawan, apan kalit silang natrap sa dihang mibunok ang kusog nga ulan nga mibaha ug mialong sa ilang agianan pagawas.