Tanggong karon sa prisohan ang usa ka baynte otso anyos nga lalaki human masikop sa mga otoridad atol sa gikasang buy-bust operation sa Purok 3, Barangay 3, lungsod sa Talakag, Bukidnon. Ang suspek nga giila sa kapolisan nga usa ka bag-ong drug personality sa maong dapit, nadakpan sa hiniusang pwersa sa Talakag Municipal Police Station.
Nasakmit gikan sa posisyon sa suspek ang tulo ka sachet sa gituohang shabu nga motimbang og usa ka punto singko gramos ug nagkantidad og P10,000. Narekober usab sa mga otoridad ang gigamit nga buy-bust money, pouch, lighter, ug uban pang paraphernalia.
Kasong paglapas sa Republic Act 9165 kun Comprehensive Dangerous Drugs Act of 2002 ang gihikay na batok sa suspek, samtang ang mga ebidensya giduso na ngadto sa Regional Forensic Unit 10 alang sa laboratory examination.