Gipahibalo ni Presidente Ferdinand “Bongbong” Marcos Jr. ang pagpatuman sa P50 nga price cap alang sa matag kilo sa imported nga bugas sa labing daling panahon.
Kini nga lakang girekomenda sa National Price Coordinating Council ug gipaabot nga pirmahan na ang usa ka Executive Order aron hingpit kining mapatuman sa tibuok nasud.
Gawas niini, gipalapdan usab sa kagamhanan ang pagbaligya sa tag-P20 nga bugas sa kapin sa 167 ka mga Rice Centers sa nasud, dungan sa hugot nga pagmonitor sa presyo sa uban pang mga pagkaon sama sa de-lata, noodles, ug pasta.
Padayon usab ang pakig-alayon sa Gobyerno sa retailers nga dili sa ipa-usbaw ang presyon sa mga nag-unang paitonon.
Samtang sa suplay sa lana, gipasalig sa Presidente nga aduna pay igong stock ang Pilipinas nga molungtad og 51 ka adlaw.
Sa laing bahin, ang mga magbabalaod sa Senado ug Kongreso nagtinabangay usab sa pagpangita og long-term solution.
Matud pa ni Sen. Kiko Pangilinan, nanginahanglan og dugang budget aron masuportahan ang apektado sa pagtaas sa presyo sa lana lakip na ang mga mag-uuma, mangingisda, ug mga drivers.
Samtang, gihisgotan usab ang mga sugyot ni Senador Bam Aquino alang sa price freeze sa lana ug ang hangyo ni Senador Imee Marcos nga temporaryong ihunong ang pagpaningil sa mga utang sa SSS, GSIS, ug PhilHealth aron dili makuhaan ang sweldo sa mga trabahante.
Gikatakdang hisgotan sa 13 ka komite sa Kongreso ang bag-ong Bayanihan 3 Law karong Abril 8 aron mas mapalig-on ang nasud batok sa bisan unsang krisis sa umaabot.