P700-M nga pondo gipasalig sa bag-ong tag-iya sa PrimeWater aron masulbad ang krisis sa panubig sa Malaybalay
Gibutyag ni Malaybalay City Water District ( MCWD ) General Manager Engr. Nolito Binahon ang bag-ong pasalig gikan sa negosyante nga si Lucio Co sa Crystal Bridge Holding Corporation nga mopalit sa PrimeWater.
Sa ilang face-to-face meeting sa Manila, nakuha sa MCWD ang saad nga mo-deposito ang bag-ong tag-iya og “one-time” nga P700 milyones sa usa ka local bank sa siyudad aron dinaliang masulbad ang kakulang sa suplay sa tubig.
Atol sa pagpangutana ni Councilor Rendon Sangalang, gikumpirma ni Engr. Binahon nga pinal na ang desisyon sa Water District nga i-terminate ang kontrata sa PrimeWater tungod sa kapakyasan niini sa pag-invest.
Nasayran nga gikan sa P500 milyones nga obligasyon sa unang lima ka tuig, mokabat lang sa P80 milyones ang aktuwal nga nagasto sa kompanya.
Dugang sa giklaro sa konsehal nga kon aduna nay bag-ong tag-iya ang primewater nganong dili na lamang makigkoordinar niini diretso, ug gikwestiyon usab ang pasalig niini nga pondo diin tulo na ka bulan ang milabay apan hangtod karon wala pa natuman.
Bisan pa man sa maong “billion-aire promise,” giklaro ni Binahon nga nagbitay pa ang opisyal nga transfer of ownership tungod kay naghulat pa kini og approval gikan sa Philippine Competition Commission. Kini nga “paper trail” ang dakong hinungdan kon ngano nga wala pa mahatag ang maong pundo hangtod sa pagkakaron.
Samtang nag-ung-ong ang arbitration ug pre-termination process, gihagit ni Sangalang ang Malaybalay City Water District nga direkta nang makig-alayon sa Crystal Bridge aron masiguro nga matuman ang saad nga P700 milyones ug dili na masumhan ang katawhan sa sige og hulat sa tubig.