Nagpabiling nagbitay ang pinal nga turnover sa serbisyo sa tubig sa dakbayan human gibutyag sa Malaybalay City Water District (MCWD) nga dako nga kantidad ang gikinahanglan alang sa legal nga proseso batok sa PrimeWater Infrastructure Corp.
Sa pakighinabi sa Bombo Radyo Malaybalay kang Engr. Nolito Binahon, General Manager sa MCWD, iyang giklaro nga gipadayon nila ang pre-termination process bisan pa sa hangyo sa kompanya nga lugwayan ang ilang operasyon hangtod sa Disyembre 31, 2026. Apan giangkon ni Binahon nga ang dakong hinungdan sa kalangan mao ang kakuwang sa pundo alang sa arbitration, diin mokabat sa P4 milyones ang gikinahanglan sa filing cost pa lamang, wala pay labot ang bayad sa mga abogado gikan sa Office of the Government Corporate Counsel (OGCC).
Tungod niini, pabilin pa nga aktibo ang PrimeWater sa siyudad samtang nag-ung-ong ang arbitration stage. Bisan pa sa maong hagit sa pundo, namugos si Binahon nga dili na mausab ang baruganan sa MCWD nga putlon na ang kasabutan ug dili na mohatag og bisan unsang extension sa maong kompanya.