Trahedya ang misugat sa usa ka pamilya human makit-an nga wala na’y kinabuhi ang usa ka 30-anyos nga lalaki sa Antulahon River, Sitio Kiudto, Barangay Hagpa niadtong Martes sa udto.
Base sa mga otoridad, mibiya ang biktima sa ilang panimalay niadtong Mayo 11 aron mangisda apan napakyas na kini sa pagpauli. Sa gihimong pagpangita sa iyang amahan ug mga paryente, nakit-an ang lawas sa biktima nga nalubong sa tubig nga duna’y gilawmon nga 3 feet. Makapasubo nga narekober pa gikan sa hawak sa biktima ang mga isda ug alimango nga nakuha niini sa wala pa mahitabo ang insidente.
Gituohan nga ang sakit nga epilepsy sa biktima maoy dakong hinungdan sa iyang pagkalunod. Gideklarar kining patay sa responding midwife, samtang ang pamilya na ang midesisyon nga ipahigayon ang embalming sa ilang panimalay.