Nakatala ang Bukidnon Police Provincial Office (BUKPPO) og kinatibuk-ang 70 ka malampusong operasyon batok sa kriminalidad sulod lamang sa usa ka semana, partikular na gikan niadtong Mayo 4 hangtod 10, 2026.
Ubos sa pagdumala ni Provincial Director PCOL Oliver Sotto Navales, moabot sa 70 ka indibidwal ang malampusong nasikop sa nagkadaiyang mga ilegal nga buluhaton sa tibuok probinsya.
Sa kampanya batok sa ilegal nga droga, nakasakmit ang kapulisan og shabu ug marijuana nga mobalor og kapin sa Php 414,694.40, diin 17 ka suspetsado ang balhog karon sa prisohan. Nadakpan usab ang duha ka “most wanted persons” ug 27 ka uban pang wanted nga dugay nang gipangita sa balaod tungod sa lain-laing mga kaso.
Hugot usab nga gipatuman ang balaod sa kinaiyahan diin narekober ang 7,622.470 board feet nga kahoy gikan sa mga operasyon batok sa illegal logging. Wala usab kaluwas ang siyam ka tawo nga nadakpan sa pito ka operasyon batok sa illegal fishing, ingon man ang mga nalambigit sa illegal mining ug illegal gambling.
Sa tulo ka operasyon batok sa “loose firearms,” tulo ka armas ang nasakmit sa kapulisan gikan sa usa ka dinakpan, samtang duha usab ang nasikop tungod sa smuggled nga sigarilyo.
Gipadayag ni PCOL Navales nga kini nga mga kalampusan maoy bunga sa walay paglubad nga dedikasyon ug kakugi sa iyang mga sakop aron masiguro ang kahusay sa komunidad.
Gipasiatab sa opisyal nga ang maong mga resulta nagsilbing lig-on nga mensahe nga seryoso ang kapulisan sa paghatag og hustisya ug pagdisiplina sa mga malapason sa lalawigan.
Pinaagi niini, gilauman nga mas molig-on pa ang pagsalig sa publiko ngadto sa kapulisan sa Bukidnon samtang gipadayon ang pagmintinar sa kalinaw.Â