Nasikop sa kaisog sa usa ka 52-anyos nga tag-iya sa agricultural store ang usa ka 23-anyos nga kawatan niadtong Miyerkules sa gabii, Mayo 13, sa Purok 10, Poblacion, Cabanglasan, Bukidnon. Na-ospital ang maong suspek human kini matigbasan sa biktima atol sa ilang panag-engkwentro sa sulod sa tindahan.
Base sa imbestigasyon sa Cabanglasan MPS, misulod ang suspetsado pinaagi sa pagkatkat sa paril sa luyo aron kabaon ang upat ka tunga nga sako sa liso sa mais nga mobalor og P26,000. Apan, nakamata ang biktima ug nahitabo ang komprontasyon diin nakuha sa biktima ang usa ka bolo ug natigbasan ang suspek sa tuo nga tiil samtang misulay kini og ikyas. Ang suspek daling gidala sa Bukidnon Provincial Medical Center (BPMC) sa Malaybalay City alang sa dugang pagtambal.
Ang dinaliang depensa sa biktima sa iyang kaugalingon ug kabtangan maoy dakong hinungdan nga wala makapuga ang suspetsado. Sa pagkakaron, nag-ung-ong na ang kasong robbery batok sa maong lalaki samtang natanggong na kini sa kustodiya sa kapulisan alang sa saktong disposisyon human kini gideklarar nga anaa na sa luwas nga kondisyon.