Hatagan og ikaduhang higayon ug dili daling taktakon sa serbisyo ang kinsa mang empleyado sa Lokal nga Pangagamhanan sa Malaybalay nga makumpirmang nagpositibo sa paggamit sa ginadili nga droga.
Kini ang gipasalig ni Jonah Ronolo, Focal Person sa City Anti-Drug Abuse Council (CADAC), diin iyang gipasabot nga ipaubos una sa saktong intervention ug rehabilitation program ang mga regular, casual, ug job order personnel nga malambigit sa gidili nga druga. Matod ni Ronolo, samtang nagbitay pa ang resulta sa confirmatory test sulod sa usa ka bulan, gipapahulay una sa trabaho ang mga nasangpit aron masiguro ang integridad sa serbisyo.
Sa higayon nga mugawas ang pinal nga resulta, ipaubos sila sa Drug Dependency Examination (DDE) aron matino ang angay nga tabang nga ihatag kanila. Ang maong programa maoy dakong hinungdan aron matabangan ang mga empleyado nga magbag-o ug dili hingpit nga mawad-an og panginabuhi, samtang nag-ung-ong ang desisyon sa appointing authority kon mamahimo pa ba silang ma-rehire human sa ilang rehabilitasyon.