Gitan-aw karon sa Olympic gold medalist nga si Hidilyn Diaz ang iyang pagtudlo sa University of the Philippines (UP) isip usa ka dako nga oportunidad aron mas mapalambo ang weightlifting sa nasod.
Matod ni Diaz, ang iyang pagsulod sa kalibutan sa akademya usa ka importante nga lakang o “stepping stone” aron hingpit nga mahiusa o ma-integrate ang weightlifting sa sistema sa edukasyon sa Pilipinas. Gusto niya nga dili lang kini isipon nga usa ka kompetisyon, kondili isip usa usab ka pormal nga kurso o disiplina nga mahimong tun-an sa mga estudyante.
Dugang pa niya, pinaagi sa pagtudlo sa UP, mas mapalapdan niya ang kahibalo sa mga batan-on bahin sa maong sport ug makatabang sa paghulma sa sunod nga henerasyon sa mga weightlifter nga mobaswat sa garbo sa nasod sa tibuok kalibutan.