Gideklara ni Presidente Ferdinand “Bongbong” Marcos Jr. ang “state of national energy emergency” sa tibuok nasud pinaagi sa pagpirma sa Executive Order No. 110 tungod sa nagpadayong kagubot sa Middle East nga naghatag og hulga sa suplay ug kalig-on sa enerhiya sa Pilipinas.
Ubos niini nga kamanduan, opisyal nga ipatuman sa kagamhanan ang Unified Package for Livelihoods, Industry, Food, and Transport (UPLIFT) isip hiniusang tubag sa tibuok administrasyon aron madumala ang suplay sa enerhiya pinaagi sa Department of Energy (DOE) ug uban pang mga ahensya.
Ang maong UPLIFT Committee pangulohan mismo sa Presidente isip Chairman, uban sa Executive Secretary ug opisyales sa nagkadaiyang departamento isip mga miyembro, samtang ang Department of Economy, Planning, and Development (DEPDev) mao ang magsilbing secretariat.
Tumong sa maong lakang nga masiguro nga dili maapektuhan ang panginabuhian, industriya, ug transportasyon sa nasud taliwala sa krisis nga dala sa tensyon sa Middle East.