Misaka og 170 porsyento ang net income sa Government Service Insurance System (GSIS) ngadto sa P43.6 bilyon sa unang quarter sa tuig 2026, itandi sa P16.1 bilyon sa parehong panahon sa miaging tuig.
Sumala sa GSIS, ang maong dakong pag-uswag natala tungod sa mas taas nga koleksyon gikan sa mga miyembro diin ang kita sa insurance misaka ngadto sa P56.6 bilyon. Misaka usab ang ilang kita sa investments ngadto sa P27.6 bilyon gikan sa P1.2 bilyon sa miaging tuig tungod sa maayong dagan sa foreign exchange ug equity valuations.
Tungod niini, nagpabiling lig-on ang pundo sa ahensya diin duna silay total assets nga P2 trilyon sa katapusan sa Marso. Gipahayag usab ni GSIS President ug General Manager Wick Veloso nga luwas ug padayong masiguro ang mga benepisyo sa mga trabahante sa gobyerno ug mga retirado hangtod sa tuig 2058.