Gipatin-aw sa Bureau of Animal Industry ubos sa Department of Agriculture nga dili dayon maapektuhan ang agricultural trade sa Pilipinas bisan pa man sa pagpatuman sa China og ban sa pag-angkat sa baboy, wild boar, ug mga produkto niini gikan sa nasud tungod sa hulga sa African Swine Fever (ASF).
Matud sa ahensya, ilang ginaila ang desisyon sa Chinese authorities, apan klaro nga ang Pilipinas wala pa ga-export og live pigs, wild boar, ug uban pang pork products padulong sa China.
Base sa report sa usa ka source, nagpagawas ang General Administration of Customs sa China og direktiba nga nagdumili sa pagpasulod sa maong mga produkto gikan sa Pilipinas tungod sa ASF concerns.
Gipasalig sa DA-BAI nga padayon ang hugot nga biosecurity measures sa nasud, lakip na ang kontrol sa paglihok sa mga hayop, pagpatay sa mga nataptan o posibleng nataptan (culling), ug mas kusog nga surveillance sa mga lugar nga adunay kaso o delikado sa impeksyon.
Matud pa sa ahensya, sukad nadiskubre ang ASF sa Pilipinas niadtong 2019, padayon ang gobyerno sa pagpatuman sa mga lakang nga uyon sa standards sa World Organisation for Animal Health (WOAH) aron mapugngan ug matubag ang sakit sa mga gialimahang baboy.