Pormal nga gikasohan sa United States Department of Justice (DOJ) si kanhi Cuban President Raul Castro tungod sa iyang kalambigitan sa pagpapusil ug pagpabunhag sa duha ka eroplano sa mga Amerikanong lungsoranon 30 ka tuig na ang milabay.
Sumala sa maong sumbong, si Castro—nga maoy Defense Minister sa Cuba niadtong panahona—ang giingong nagmando sa ilang military jets nga pusilon ang duha ka gamay nga eroplano nga gipanag-iya sa “Brothers to the Rescue,” usa ka Cuban exile group nga nakabase sa Miami. Upat ka mga piloto ug tripulante ang namatay sa maong insidente nga nahitabo sa international airspace niadtong Pebrero 24, 1996.
Gipahayag sa mga opisyal sa US nga kini nga lakang nagpakita nga walay sipyat ang balaod ug manubag gayod ang kinsa mang nagpasiugda og terorismo batok sa mga Amerikano, bisan unsa pa kadugay ang milabay.
Si Castro, nga nag-pangedaron na karon og 94 anyos, kasamtangang nagpuyo sa Cuba ug dako ang posibilidad nga dili kini i-extradite o itugyan sa gobyerno sa Cuba ngadto sa Amerika aron moatubang sa korte.