Kapin kwarenta’y sais mil pesos (P46,000) ang kinatibuk-ang kantidad sa kuwarta ang nadiskubrehang nadagit sa wala mailhing mga kawatan gikan sa usa ka tindahan sa Purok 4, Barangay Sto. Domingo, San Fernando, Bukidnon.
Sumala sa San Fernando Municipal Police Station, personal nga mireport ang kwarenta’y otso (48) anyos nga tag-iya human nadiskubrehan sa iyang kahera nga giguba ang kandado ug kadena sa pultahan gamit ang puthaw nga kabilya. Gawas sa P46,000 nga cash sulod sa cashier’s drawer, giguba usab sa mga suspek ang usa ka vendo machine diin nadagit usab ang wala pa matino nga kantidad sa mga sinsilyo sulod niini.Matod sa usa ka silingan, nakadungog siya nga adunay nag-abli sa roll-up door sa establisemento apan wala niya kini hatagi og pagduda tungod kay naanad siya nga adunay tawo sa maong dapit. Padayon pa ang imbestigasyon sa kapolisan aron mailhan ug madakpan ang mga suspek nga naghimo sa maong pagpangawat.