Nagpabiling hilom ug walay opisyal nga reaksyon ni Senate President Alan Peter Cayetano human gipadayag ni Interior Secretary Jonvic Remulla nga walay nahitabong pag-atake sa Senado atol sa insidente sa pagpamusil sa second floor sa building sa Senado.
Matud ni Remulla, base sa imbestigasyon sa Department of the Interior and Local Government, nga unang nagpabuto og warning shot si suspended Sergeant-at-Arms Mao Aplasca samtang mitubag usab og cover fire ang mga operatiba sa National Bureau of Investigation samtang mipahilayo sa lugar.
Kahinumduman, nga gipamulong ni Cayetano nga giatake ang Senado sa mga personnel sa NBI nga anaa sa GSIS building, ug gusto niining maapil sa imbestigasyon ang NBI ug ang Department of Justice.
Samtang, nagdumili usab sa paghatag og dugang komento sila Senador Robin Padilla ug Senador Jinggoy Estrada ug miluwat nga hulaton na lamang ang opisyal nga pamahayag sa Senate President.
Apan alang kang Padilla, ang warning shot ni Aplasca ug sa NBI maoy nakapakalma sa sitwasyon ug nagpakita nga dili magkaaway ang duha ka kampo, kundili adunay kakuwang sa koordinasyon ug komunikasyon.
Sa laing bahin, nanawagan sila Senador Raffy Tulfo ug Senador Sherwin Gatchalian og patas ug walay pinalabi nga imbestigasyon sa nahitabong insidente.
Matud ni Tulfo, wala’y aktuwal nga pag-atake sa Senado ug ang pagpamusil naggikan lamang sa komprontasyon tali sa Office of the Sergeant-at-Arms ug sa NBI, busa kinahanglan usab nga manubag ang tanang personnel nga nagpabuto sa duha ka kampo.