Gipahayag sa International Criminal Court (ICC) Registry nga gipaubos karon sa mas strikto ug “continuous cell monitoring” si kanhi President Rodrigo Duterte sulod sa iyang selda didto sa The Hague, Netherlands tungod sa iyang panglawas.
Sumala sa taho sa ICC, giila si Duterte nga usa ka “elderly detained person” nga adunay taas nga risgo nga matumba tungod sa iyang pangedaron ug mga gihambin nga sakit. Gipasabut sa ahensya nga sa pipila ka talagsaong higayon nga natumba ang kanhi presidente, daling nakaresponde ang mga guwardiya aron tabangan siya ug gilayon kining gipaubos sa medical assessment. Giklaro usab sa ICC nga sulod sa milabay nga 30 ka adlaw, wala nay natala nga natumba si Duterte ug naghimo na sila og mga kausandawan sa iyang selda aron mas luwas ang iyang paglihok-lihok.
Sa pikas bahin, gipahayag sa Department of Foreign Affairs (DFA) karong Huwebes, Mayo 21, nga posibleng ibalewala lang sa United Nations Human Rights Council ang panawagan sa usa ka Japanese NGO nga buhian si Duterte gikan sa kustodiya sa ICC.
Matod sa DFA, sagad nga makadawat ang UN og ingon niini nga mga pahayag ug pormal ra kining i-prosedur nga walay ihatag nga komento o bisan unsang aksiyon. Dili usab kini ang unang higayon nga nagdala ang International Career Support Association (ICSA) og “walay basehan” nga mga pangangkon sa UN ug wala pa’y nagbunga og maayo sa ilang mga nakalabay nga aksiyon.