Kung mapagawas sa International Criminal Court si Kanhi Presidente Rodrigo Duterte, nagpasabot nga walay ngipon ang balaod sa ICC.
Kana matud pa ang pamahayag ni Atty. Eddie Cuarisma atol sa eksklusibong pakighinabi sa Bombo Radyo Malaybalay sunod sa kontrobersyal nga resolusyon nga gipagawas sa Senado diin 15 ka senador ang mipabor nga hatagan og house arrest ang kanhi presidente, tulo ang misupak ug duha ang nag abstain.
Saysay pa ni Atty. Cuarisma, kabubut-on sa majority sa Senado ang pagsuporta sa resolusyon apan kung mahitabo man ang house arrest angayan kining pagahimoon alang sa tanan nga adunay parehas nga sitwasyon uban sa klarong humanitarian consideration.
Dugang pa niini, huyang ang Pilipinas tungod kay mas gina una pa niini ang kalooy kumpara sa mga dautang binuhatan atol sa duterte administration, lakip na ang alegasyon sa pagpatay sa kapin 30,000 ka mga indibidwal nga nalambigit sa extra judicial killings.
Bisan pa man sa kasamtangang political support nga nadawat sa kanhi presidente, matud pa ni Atty. Cuarisma nga nagpabilin gihapon sa kamot sa International Criminal Court ang desisyon kung buhian ba o ipadayon ang arresto kang Duterte.