Malipayong gipahibalo sa sikat nga Hollywood singer nga si Jessie J nga opisyal na siyang “cancer-free” human sa usa ka tuig nga pakigbisog batok sa breast cancer.
Sa iyang social media account, gipaambit sa “Price Tag” singer ang usa ka video sa iyang kaugalingon samtang nagpaabot sa resulta sa iyang tinuig nga check-up ug Magnetic Resonance Imaging (MRI). Matod sa singer, nakahilak siya og maayo sa tulo ka oras tungod sa grabeng kalipay ug kahupayan sa dihang nakuha na niya ang maayong balita gikan sa mga doktor.
Kahinumduman nga niadtong Hunyo 2025, kura-kurat nga gibutyag sa 38-anyos nga singer nga nadayagnos siya nga adunay “early stage breast cancer” hinungdan nga gipaubos siya sa operasyon ug mga serye sa medikal nga pagpatambal. Nagpasalamat usab si Jessie J sa tanang fans ug pamilya nga nagpaluyo ug naghatag kaniya og kusog sa tibuok dagan sa iyang pagkaayo.