Nagpabilin ang hugot nga awhag sa City Health Office sa dakbayan sa Malaybalay ngadto sa katawhan nga magpahigayon og regular nga pagsusi sa panglawas, ilabi na ang pagpa-test sa Human Immunodeficiency Virus (HIV).
Sumala sa CHO Malaybalay, ang sayong pagkakaplag sa virus maoy yawe aron dinalian nga mahatagan og saktong medikasyon ang usa ka pasyente, nga mamahimong dalan aron sila mabuhi gihapon nga normal, madasigon, ug himsog.
Gipasalig sa maong buhatan nga gawas sa libre kini, aduna usab bug-os nga proteksyon sa pribasiya kun confidentiality ang si kinsa man nga mopa-ubos sa ilang HIV testing services.
Gidugang sa ahensya nga dako ang papel sa saktong edukasyon aron hingpit nga mapapas ang stigma ug pagpihig, o dili patas nga pagtratar batok sa mga people living with HIV.
Tungod niini, nanawagan kini sa publiko nga suportahan ang mga inisyatibo sa gobyerno ug magbaton og responsableng panglawas pinaagi sa pagpakonsulta sa mga eksperto sa medisina.