Nagpadayon sa pagsaka ang karera sa Pinay singer nga si Gwyn Dorado didto sa South Korea human siya napili nga maoy mokanta sa usa sa mga Official Soundtrack (OST) sa sikat ug nag-trending karon nga Korean drama nga “My Royal Nemesis.”
Gidalit ni Dorado ang iyang emosyonal nga boses pinaagi sa kantang “Losing My Heart,” usa ka Korean ballad nga opisyal nga gipagawas dungan sa ikaunom nga episode sa maong serye nga gipalabas sa SBS ug Netflix. Kahinumduman nga unang nailhan si Gwyn sa edad nga 10 anyos sa dihang nahimo kining grand finalist sa Asia’s Got Talent niadtong 2015, ug nakanta usab siya sa nasodnong awit sa SONA ni kanhi Presidente Noynoy Aquino niadtong 2016.
Tungod sa iyang talagsaong talento, nakalangkat siya og 5-year contract sa South Korean agency nga A.O Entertainment niadtong 2024. Mas misamot pa ang iyang kasikat sa dihang nakuha niya ang ikaduhang dapit (2nd place) sa sikat nga Korean singing competition nga “Sing Again 4” sayo ning tuiga, diin siya ra ang nag-inusarang langyaw o foreign finalist nga nakasulod sa grand finals ug midayeg kaniya ang mga Koreanong hurado tungod sa iyang nindot nga paglitok sa pinulongang Korean.