Kasamtangan nang balhog sa bilanggoan ang usa ka disinuebe (19) anyos nga batan-on human kini dinalian nga mitahan sa mga otoridad human sa iyang gikasang duguong pagpangluba nga mikalot sa kinabuhi sa usa ka traynta’y siyete (37) anyos nga lalaki didto sa lungsod sa Cabanglasan, Bukidnon.
Sa opisyal nga report gikan ni Police Captain Linomer Casires, ang Officer-in-Charge sa Cabanglasan Municipal Police Station, naila ang biktima nga si alyas “Jany,” samtang pauli na unta kini kauban ang iyang higala sa Purok Otso (8), Barangay Mandahican pasado alas-saysay trenta (6:30) sa gabii niadtong Mayo 22. Apan pag-abot sa maong dapit, nagkasugat ug nagkabikil ang biktima ug ang suspek nga pulos lango sa ilimnong makahubog nga miresulta sa init nga pagsinumbagay diin dinalian nga giluba sa suspek ang tuo nga bahin sa tiyan sa biktima.
Gideklarar nga dead on arrival sa mga doktor ang biktima human gidala sa tambalanan samtang ang suspek dali nga misibat apan mitahan ra usab sa mga opisyal sa barangay nga dinalian usab nga gi-turnover ngadto sa kapolisan. Sa pagkakaron, kasong homicide ang gi-andam nga ipasaka batok sa suspek alang sa saktong disposisyon sa korte.