Nagkalapad na ang karera sa musika sa South Korea sa Pinay singer nga si Gwyn Dorado human napili ang kanta niii isip official theme song sa sikat nga K-drama nga “My Royal Nemesis.”
Ang maong kalampusan ang dugang pamatuod sa iyang pagsikat sa nasud, ilabi na human kini milampos sa grand finals sa Korean singing competition nga Sing Again, diin siya ang nakakuha sa ikaduha nga pinakataas nga boto. Gidayeg pag-ayo si Gwyn sa mga hurado tungod sa iyang kahanas sa pag-kanta ug sa pag-estorya og Korean.
Sa maong show, mas naila kini pinaagi sa iyang screen name nga “Dorado.” Si Gwyn nagsugod sa iyang karera sa edad nga 10 sa Asia’s Got Talent diin siya nahimong Top 5 finalist kauban sila El Gamma Penumbra ug Gerphil Flores.
Niadtong 2016, gi-awit usab niini ang Philippine National Anthem atol sa katapusang State of the Nation Address (SONA) ni kanhi Presidente Noynoy Aquino. Niadtong Pebrero 2024, mipirma kini og lima ka tuig nga kontrata sa A.O. Entertainment sa South Korea.
Kini ang nahimong pultahan sa iyang pag-sulod sa K-music industry, diin gipagawas niini ang kantang “What If” isip soundtrack sa K-drama nga ToGetHer, ug ang iyang debut single nga “Way.”