Hingpit nang mitalikod sa armadong pakigbisog ug dinalian nga mitahan sa mga otoridad ang usa ka giingong kanhi miyembro sa Militia ng Bayan didto sa siyudad sa Malaybalay.
Sa opisyal nga report gikan sa kapolisan, giila ang mibalik sa sabakan sa gobyerno nga si alyas “Jan2x,” kinsa kanhi sakop sa dismantled Guerilla Front 89 sa CPP-NPA. Malampusong natigayon ang pagtahan ni Jan2x pasado alas-nuybe kwarenta (9:40) sa buntag niadtong Mayo 24 pinaagi sa usa ka intelligence-driven operation sa Bukidnon 1st Provincial Mobile Force Company kauban ang Malaybalay ug Cabanglasan Police Station subay sa OPLAN “OMAY”.
Sa pagkakaron, temporaryo nang gipreserba ang maong kanhi rebelde sa kustodiya sa Bukidnon 1st PMFC alang sa ipahigayong custodial debriefing samtang dinalian usab nga gihikay ang iyang mga dokumento aron hingpit kini nga makadawat og mga hinabang ug livelihood assistance gikan sa Enhanced Comprehensive Local Integration Program o E-CLIP sa gobyerno.