Gisaway sa sikat nga aktres nga si Nadine Lustre ang nagkadaiyang isyu sa nasud sama sa dili patas nga pagtratar sa mga residente sa Siargao, pagdagmal sa mga mananap, ug ang walay puas nga pagpamutol sa mga kahoy. Pinaagi sa iyang Instagram community channel, wala nagpili og pulong ang aktres sa pagpahayag sa iyang grabeng kabalaka.
Matud ni Nadine, kinsa dugay nang nagpuyo sa Isla sa Siargao sukad niadtong panahon sa pandemya, gipadayag niini nga makapasubo ang kawalay respeto ug agresyon nga nasinati sa mga lokal nga komunidad gikan sa pipila ka mga bisita sa pipila ka bahin sa Siargao.
Gawas niini, gihisgutan usab sa aktres ang makaluluoy nga kahimtang sa mga mananap nga giisip lamang nga walay bili sa kadaghanan, dungan sa pagpukan sa mga kakahoyan nga gihimong rason ang giingong “kalamboan” apan alang niini usa kini ka baliktad nga lakang sa nasud.
Ang maong hait nga reaksyon sa aktres na-timing usab sa nagpadayong kontrobersiya ug mga protesta batok sa pagpamutol sa mga kahoy sa kaulohang Manila.
Gumikan niini, nanawagan si Nadine sa publiko nga magbaton og mas lawom nga pagmatngon, paghigugma, ug respeto, dili lamang sa komunidad, kondili lakip na sa kinaiyahan ug sa tanang buhing binuhat.Â