Gikuwestyon sa pipila ka senador ang taas nga kantidad sa pagtukod og mga classroom nga gipasiugdahan sa Department of Education (DepEd) ug Department of Public Works and Highways (DPWH).
Sa gihimong imbestigasyon sa Senado, gipangutana sa mga senador nganon ang ubang proyekto sa mga tunghaan mukabat sa P2 milyon hangtod P4 milyon ang matag usa ka classroom, depende sa lokasyon ug disenyo.
Matud nila, adunay mga pribadong eskwelahan ug lokal nga kagamhanan nga nakatukod og classroom sa mas ubos nga kantidad nga wala magkompromiso sa kalidad.
Matud ni Senadora Loren Legarda, diskumpiyado kini sa mga kontraktor nga nagmugna og mga proyekto nga wala muhaom sa kalidad ug gidak-on sa matag pasilidad nga nahimo.
Gipasiugda sa mga senador nga kinahanglan kini masusi, aron masiguro nga wala’y mausik nga kuwarta sa katawhan, ug aron mas daghang mga classroom ang matukod sa mas praktikal nga presyo, ilabi na nga daghan pa sa mga estudyante karon ang nagklase sa daan o temporaryo nga mga tunghaan.
Gipangayo usab sa Senado nga magpasa ang DPWH ug DepEd og detalyado nga breakdown sa ilang paggasto ug standard nga costing guidelines alang sa mga proyekto sa eskwelahan.
Kini human namatikdan usab ni senador Raffy Tulfo nga kasagaran walay toilet room ang kada building ug layo sa mga estudyante. Gikuwestiyon niini ang kamahal sa budget sa mga tunghaan apan kulang ang serbisyo sa pasilidad sa mga kabataan.