Nanawagan ang usa ka legal expert nga matuman ang tinuod nga reporma sa panggobyerno sa nasud ilabi na sa nahibilin nga katuigan sa termino ni Presidente Ferdinand Marcos Jr. Matud pa ni Atty. Oscar Moreno, usa ka law professor ug corporate lawyer, angayan nga unahon sa administrasyon ang kalimpyo ug pagkamatinud-anon sa serbisyo publiko.
Gilauman niini nga ang legasya nga ibilin sa presidente mao ang transparency ug accountability sa tanang ahensya sa gobyerno. Gibutyag ni Moreno nga ang iyang panawagan napasibo sa kasamtangang isyu sa korapsyon ilabi na sa mga proyekto sa flood control nga kasamtangang giimbestigahan na sa House Committee human kini gi-question sa publiko ug pipila ka mambabalaod.
Saysay pa niini, grabe ang mga budget insertion sa kasamtangan nga sagad naa sa mga proyekto sa inprastruktura, apan walay klaro ang detalye ug paniguro kung asa gayud padulong ang kuwarta. Kini, matod pa ni Moreno, usa ka hulga sa pondo sa katawhan kung dili kini tutukan sa tukmang pag-audit ug imbestigasyon.
Gihangyo sa legal expert ang Malacañang ug ang Kongreso nga molihok dayon aron mahatagan ug tukma nga solusyon ang maong mga isyu.